ਸ਼੍ਰੀ ਰਾਮ ਕਥਾ ਦੇ ਛੇਵੇਂ ਦਿਵਸ ਸ਼ਬਰੀ ਪ੍ਰਸੰਗ ਨੇ ਸ਼ਰਧਾਲੂਆਂ ਨੂੰ ਕੀਤਾ ਭਾਵ-ਵਿਭੋਰ, ਭਗਤੀ ਭਾਵ ਦਾ ਦਿੱਤਾ ਸੰਦੇਸ਼

ਹੁਸ਼ਿਆਰਪੁਰ/ਦਲਜੀਤ ਅਜਨੋਹਾ 

 ਦਿਵਿਆ ਜਯੋਤੀ ਜਾਗ੍ਰਤੀ ਸੰਸਥਾਨ ਵੱਲੋਂ ਸ਼੍ਰੀ ਪ੍ਰਾਣੇਸ਼ਵਰ ਮਹਾਦੇਵ ਮੰਦਰ ਦੇ ਸਹਿਯੋਗ ਨਾਲ ਆਯੋਜਿਤ ਸੱਤ ਦਿਵਸੀ ਸ਼੍ਰੀ ਰਾਮ ਕਥਾ ਦਾ ਆਯੋਜਨ ਪਿੰਡ ਬਿੰਜੋਂ ਦੇ ਨੇੜੇ ਸਥਿਤ ਗਵਰਨਮੈਂਟ ਹਾਈ ਸਕੂਲ ਦੇ ਪ੍ਰਾਂਗਣ ਵਿੱਚ ਬੜੇ ਹੀ ਸ਼ਰਧਾ ਅਤੇ ਭਗਤੀਮਈ ਮਾਹੌਲ ਵਿੱਚ ਕੀਤਾ ਜਾ ਰਿਹਾ ਹੈ। ਕਥਾ ਦੇ ਛੇਵੇਂ ਦਿਵਸ ਸ਼੍ਰੀ ਆਸ਼ੁਤੋਸ਼ ਮਹਾਰਾਜ ਜੀ ਦੀ ਸ਼ਿਸ਼ਿਆ ਸਾਧਵੀ ਸੁਸ਼੍ਰੀ ਮਨਸਵਿਨੀ ਭਾਰਤੀ ਜੀ ਨੇ ਪ੍ਰਭੂ ਸ਼੍ਰੀ ਰਾਮ ਜੀ ਦੀ ਮਹਿਮਾ ਦਾ ਬਹੁਤ ਹੀ ਭਾਵਪੂਰਨ ਅਤੇ ਆਧਿਆਤਮਿਕ ਵਰਣਨ ਕੀਤਾ।

ਕਥਾ ਦੇ ਛੇਵੇਂ ਦਿਵਸ ਮਾਤਾ ਸ਼ਬਰੀ ਦੇ ਪ੍ਰਸੰਗ ਦਾ ਬਹੁਤ ਹੀ ਮਾਰਮਿਕ ਅਤੇ ਪ੍ਰੇਰਨਾਦਾਇਕ ਵਰਣਨ ਕੀਤਾ ਗਿਆ। ਸਾਧਵੀ ਜੀ ਨੇ ਆਪਣੇ ਪ੍ਰਵਚਨਾਂ ਰਾਹੀਂ ਦੱਸਿਆ ਕਿ ਮਾਤਾ ਸ਼ਬਰੀ ਦੀ ਪ੍ਰਭੂ ਸ਼੍ਰੀ ਰਾਮ ਜੀ ਪ੍ਰਤੀ ਅਟੁੱਟ ਸ਼ਰਧਾ, ਨਿਸ਼ਕਾਮ ਪ੍ਰੇਮ ਅਤੇ ਸਾਲਾਂ ਦੀ ਉਡੀਕ ਸੱਚੀ ਭਗਤੀ ਦੀ ਇੱਕ ਅਨੋਖੀ ਮਿਸਾਲ ਹੈ।

ਸਾਧਵੀ ਜੀ ਨੇ ਦੱਸਿਆ ਕਿ ਮਾਤਾ ਸ਼ਬਰੀ ਨੇ ਆਪਣੇ ਗੁਰੂ ਦੇ ਬਚਨਾਂ ਉੱਤੇ ਪੂਰਨ ਵਿਸ਼ਵਾਸ ਰੱਖਦਿਆਂ ਸਾਰੀ ਉਮਰ ਪ੍ਰਭੂ ਸ਼੍ਰੀ ਰਾਮ ਜੀ ਦੇ ਆਗਮਨ ਦੀ ਉਡੀਕ ਕੀਤੀ। ਉਨ੍ਹਾਂ ਦਾ ਹਰ ਦਿਨ ਪ੍ਰਭੂ ਦੇ ਸਵਾਗਤ ਦੀ ਤਿਆਰੀ ਅਤੇ ਉਨ੍ਹਾਂ ਦੇ ਸਿਮਰਨ ਵਿੱਚ ਬੀਤਦਾ ਸੀ। ਅੰਤ ਵਿੱਚ ਜਦੋਂ ਪ੍ਰਭੂ ਸ਼੍ਰੀ ਰਾਮ ਜੀ ਉਨ੍ਹਾਂ ਦੀ ਕੁਟੀਆ ਵਿੱਚ ਪਧਾਰੇ ਤਾਂ ਸ਼ਬਰੀ ਦਾ ਜੀਵਨ ਧੰਨ ਹੋ ਗਿਆ। ਇਸ ਪਾਵਨ ਪ੍ਰਸੰਗ ਤੋਂ ਇਹ ਸੰਦੇਸ਼ ਮਿਲਦਾ ਹੈ ਕਿ ਸੱਚੇ ਹਿਰਦੇ, ਨਿਸ਼ਕਪਟ ਪ੍ਰੇਮ ਅਤੇ ਦ੍ਰਿੜ੍ਹ ਵਿਸ਼ਵਾਸ ਨਾਲ ਕੀਤੀ ਗਈ ਭਗਤੀ ਕਦੇ ਵੀ ਨਿਸਫਲ ਨਹੀਂ ਜਾਂਦੀ।

ਉਨ੍ਹਾਂ ਦੱਸਿਆ ਕਿ ਪ੍ਰਭੂ ਬਾਹਰੀ ਆਡੰਬਰਾਂ ਨੂੰ ਨਹੀਂ, ਸਗੋਂ ਭਗਤ ਦੇ ਹਿਰਦੇ ਵਿੱਚ ਵੱਸਦੇ ਪ੍ਰੇਮ ਅਤੇ ਸਮਰਪਣ ਨੂੰ ਸਵੀਕਾਰ ਕਰਦੇ ਹਨ। ਸ਼ਬਰੀ ਪ੍ਰਸੰਗ ਸਾਨੂੰ ਸਿੱਖਿਆ ਦਿੰਦਾ ਹੈ ਕਿ ਪ੍ਰਭੂ ਦੀ ਪ੍ਰਾਪਤੀ ਲਈ ਸੱਚਾ ਪ੍ਰੇਮ, ਸ਼ਰਧਾ, ਸਮਰਪਣ ਅਤੇ ਨਿਰਮਲ ਭਗਤੀ ਭਾਵ ਦਾ ਹੋਣਾ ਬਹੁਤ ਜ਼ਰੂਰੀ ਹੈ।

ਸਾਧਵੀ ਜੀ ਦੇ ਭਾਵਪੂਰਨ ਪ੍ਰਵਚਨਾਂ ਅਤੇ ਪ੍ਰਭੂ ਦੀ ਇਸ ਦਿਵਿਆ ਲੀਲਾ ਦਾ ਵਰਣਨ ਸੁਣ ਕੇ ਹਾਜ਼ਰ ਸ਼ਰਧਾਲੂ ਭਾਵ-ਵਿਭੋਰ ਹੋ ਉੱਠੇ। ਅਨੇਕਾਂ ਸ਼ਰਧਾਲੂ ਭਗਤੀ ਰਸ ਵਿੱਚ ਡੁੱਬ ਕੇ ਪ੍ਰਭੂ ਪ੍ਰਤੀ ਆਪਣੀ ਅਟੁੱਟ ਆਸਥਾ ਅਤੇ ਪ੍ਰੇਮ ਦੀ ਅਨੁਭੂਤੀ ਕਰਦੇ ਨਜ਼ਰ ਆਏ।

ਕਥਾ ਦੌਰਾਨ ਮੰਚ ਤੋਂ ਪੇਸ਼ ਕੀਤੇ ਗਏ ਦਿਵਿਆ ਭਜਨਾਂ ਅਤੇ ਮਧੁਰ ਭਗਤੀਮਈ ਸੰਗੀਤ ਨੇ ਪੂਰੇ ਮਾਹੌਲ ਨੂੰ ਭਗਤੀ ਰਸ ਨਾਲ ਸਰਾਬੋਰ ਕਰ ਦਿੱਤਾ। ਪ੍ਰਭੂ ਦੇ ਪਾਵਨ ਗੁਣਗਾਨ ਨੂੰ ਸੁਣ ਕੇ ਸ਼ਰਧਾਲੂ ਆਨੰਦਮਗਨ ਹੋ ਗਏ ਅਤੇ ਸਾਰਾ ਪੰਡਾਲ “ਜੈ ਸ਼੍ਰੀ ਰਾਮ” ਦੇ ਜੈਕਾਰਿਆਂ ਨਾਲ ਗੂੰਜ ਉੱਠਿਆ।

ਕਥਾ ਦੇ ਸਮਾਪਨ ਮੌਕੇ ਸਾਰੇ ਸ਼ਰਧਾਲੂਆਂ ਨੇ ਸਮੂਹਿਕ ਰੂਪ ਵਿੱਚ ਪ੍ਰਭੂ ਸ਼੍ਰੀ ਰਾਮ ਜੀ ਦੀ ਪਾਵਨ ਆਰਤੀ ਵਿੱਚ ਸ਼ਰਧਾਪੂਰਵਕ ਭਾਗ ਲਿਆ। ਇਸ ਮੌਕੇ ਮੰਦਰ ਕਮੇਟੀ ਦੇ ਮੈਂਬਰਾਂ ਸਮੇਤ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ ਹਾਜ਼ਰ ਰਹੇ।

ਇਸ ਉਪਰੰਤ ਸੰਗਤ ਦੀ ਸੇਵਾ ਅਤੇ ਪ੍ਰਭੂ ਭਗਤੀ ਦੇ ਭਾਵ ਨਾਲ ਲੰਗਰ-ਪ੍ਰਸਾਦ ਦੀ ਵਿਵਸਥਾ ਕੀਤੀ ਗਈ, ਜਿਸ ਨੂੰ ਹਾਜ਼ਰ ਸਾਰੇ ਸ਼ਰਧਾਲੂਆਂ ਨੇ ਸ਼ਰਧਾਪੂਰਵਕ ਗ੍ਰਹਿਣ ਕੀਤਾ।

ਇਸ ਤਰ੍ਹਾਂ ਸ਼੍ਰੀ ਰਾਮ ਕਥਾ ਦੇ ਛੇਵੇਂ ਦਿਵਸ ਸ਼ਬਰੀ ਪ੍ਰਸੰਗ ਨੇ ਸਮੁੱਚੇ ਮਾਹੌਲ ਨੂੰ ਪ੍ਰੇਮ, ਸ਼ਰਧਾ ਅਤੇ ਭਗਤੀ ਦੇ ਦਿਵਿਆ ਰੰਗ ਵਿੱਚ ਰੰਗ ਦਿੱਤਾ। ਸ਼ਰਧਾਲੂਆਂ ਨੇ ਇਸ ਪਾਵਨ ਪ੍ਰਸੰਗ ਰਾਹੀਂ ਇਹ ਪ੍ਰੇਰਣਾ ਪ੍ਰਾਪਤ ਕੀਤੀ ਕਿ ਸੱਚੀ ਭਗਤੀ ਬਾਹਰੀ ਦਿਖਾਵੇ ਵਿੱਚ ਨਹੀਂ, ਸਗੋਂ ਨਿਰਮਲ ਹਿਰਦੇ, ਨਿਸ਼ਕਾਮ ਪ੍ਰੇਮ ਅਤੇ ਪੂਰਨ ਸਮਰਪਣ ਵਿੱਚ ਨਿਹਿਤ ਹੈ।