94 ਸਾਲਾ ਰਿਟਾਇਰਡ ਬੀ.ਪੀ.ਈ.ਓ. ਕਿਸ਼ੋਰ ਚੰਦ ਦੇ ਦੇਹਾਂਤ ਮਗਰੋਂ ਪਰਿਵਾਰ ਨੇ ਉਨ੍ਹਾਂ ਦਾ ਪਾਰਥਿਵ ਸਰੀਰ ਪੀ.ਜੀ.ਆਈ. ਨੂੰ ਕੀਤਾ ਸਮਰਪਿਤ

ਹੁਸ਼ਿਆਰਪੁਰ/ਦਲਜੀਤ ਅਜਨੋਹਾ
ਗੜਸ਼ੰਕਰ ਦੇ 94 ਸਾਲਾ ਰਿਟਾਇਰਡ ਬਲੌਕ ਪ੍ਰਾਇਮਰੀ ਐਜੂਕੇਸ਼ਨ ਅਫਸਰ ਕਿਸ਼ੋਰ ਚੰਦ ਦੇ ਦੇਹਾਂਤ ਮਗਰੋਂ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਉਨ੍ਹਾਂ ਦਾ ਪਾਰਥਿਵ ਸਰੀਰ ਪੀ.ਜੀ.ਆਈ. ਚੰਡੀਗੜ੍ਹ ਦੀ ਬਾਡੀ ਡੋਨੇਸ਼ਨ ਕਮੇਟੀ ਦੇ ਚੇਅਰਮੈਨ ਡਾ. ਤਰਸੇਮ ਸਿੰਘ ਅਤੇ ਰੋਟਰੀ ਆਈ ਐਂਡ ਕਾਰਨੀਅਲ ਟ੍ਰਾਂਸਪਲਾਂਟ ਸੋਸਾਇਟੀ ਦੇ ਮੈਂਬਰਾਂ ਨੂੰ ਸਮਰਪਿਤ ਕਰ ਦਿੱਤਾ ਹੈ।ਗੜਸ਼ੰਕਰ ਦੇ ਵਾਰਡ ਨੰਬਰ ਤਿਰਾਂ ਦੇ ਵਸਨੀਕ ਕਿਸ਼ੋਰ ਚੰਦ ਦੇ ਪੁੱਤਰ ਪ੍ਰਿੰਸੀਪਲ ਜਗਦੀਸ਼ ਰਾਏ ਅਤੇ ਐਸ.ਡੀ.ਓ. ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਜੀ ਨੇ 2006 ਵਿੱਚ ਬਾਡੀ ਡੋਨੇਸ਼ਨ ਲਈ ਵਸੀਅਤ ਤਿਆਰ ਕੀਤੀ ਸੀ। ਉਨ੍ਹਾਂ ਦੀ ਮੌਤ ਪਿੱਛੋਂ ਅੱਜ ਉਨ੍ਹਾਂ ਦਾ ਪਾਰਥਿਵ ਸਰੀਰ ਪੀ.ਜੀ.ਆਈ. ਭੇਜ ਦਿੱਤਾ ਗਿਆ ਹੈ।ਬਾਡੀ ਡੋਨੇਸ਼ਨ ਕਮੇਟੀ ਦੇ ਚੇਅਰਮੈਨ ਡਾ. ਤਰਸੇਮ ਸਿੰਘ ਨੇ ਕਿਹਾ ਕਿ ਜੇ ਕੋਈ ਵਿਅਕਤੀ ਆਪਣੇ ਜੀਵਨਕਾਲ ਵਿੱਚ ਬਾਡੀ ਡੋਨੇਸ਼ਨ ਲਈ ਵਸੀਅਤ ਕਰਦਾ ਹੈ, ਤਾਂ ਉਸਦੇ ਮੌਤ ਮਗਰੋਂ ਉਸਦਾ ਸਰੀਰ 3 ਤੋਂ 5 ਘੰਟਿਆਂ ਦੇ ਅੰਦਰ ਸੰਬੰਧਤ ਹਸਪਤਾਲ ਦੇ ਐਨਾਟੋਮੀ ਵਿਭਾਗ ਵਿਚ ਪਹੁੰਚਾਇਆ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਦੱਸਿਆ ਕਿ ਪਾਰਥਿਵ ਸਰੀਰ ਦਾ ਇਸਤੇਮਾਲ ਮੁੱਖ ਤੌਰ ’ਤੇ ਮੈਡੀਕਲ ਸਿੱਖਿਆ, ਖੋਜ ਅਤੇ ਟ੍ਰੇਨਿੰਗ ਲਈ ਕੀਤਾ ਜਾਂਦਾ ਹੈ, ਜਿਵੇਂ ਕਿ ਸ਼ਰੀਰ ਰਚਨਾ ਵਿਭਾਗ ਵਿੱਚ। ਗੰਭੀਰ ਤੌਰ ’ਤੇ ਸੜੇ ਮਰੀਜ਼ਾਂ ਦੀ ਇਲਾਜ ਲਈ ਤਵਚਾ ਦਾਨ ਵੀ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੀ ਹੈ।ਡਾ. ਤਰਸੇਮ ਸਿੰਘ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਜੀਵਨਕਾਲ ਦੌਰਾਨ ਆਪਣੀਆਂ ਅੱਖਾਂ ਦਾਨ ਕਰਨ ਅਤੇ ਬਾਡੀ ਡੋਨੇਸ਼ਨ ਲਈ ਵਸੀਅਤ ਤਿਆਰ ਕਰਨ ਲਈ ਅੱਗੇ ਆਉਣ। ਇਸ ਤਰ੍ਹਾਂ ਮਰਨੋਂ ਬਾਅਦ ਉਨ੍ਹਾਂ ਦੀਆਂ ਅੱਖਾਂ ਕਿਸੇ ਦੀ ਜ਼ਿੰਦਗੀ ਰੌਸ਼ਨ ਕਰ ਸਕਦੀਆਂ ਹਨ ਅਤੇ ਉਨ੍ਹਾਂ ਦਾ ਸਰੀਰ ਦਾਨ ਕਿਸੇ ਨੂੰ ਨਵੀਂ ਜ਼ਿੰਦਗੀ ਦੇ ਸਕਦਾ ਹੈ ਜਾਂ ਮੈਡੀਕਲ ਰਿਸਰਚ ਲਈ ਸਹਾਇਕ ਹੋ ਸਕਦਾ ਹੈ।ਇਸ ਮੌਕੇ ’ਤੇ ਰੋਟਰੀ ਆਈ ਐਂਡ ਕਾਰਨੀਅਲ ਟ੍ਰਾਂਸਪਲਾਂਟ ਸੋਸਾਇਟੀ, ਗੜਸ਼ੰਕਰ ਯੂਨਿਟ ਦੇ ਪ੍ਰਧਾਨ ਲਖਵਿੰਦਰ ਕੁਮਾਰ, ਖਜਾਨਚੀ ਰਾਜਨ ਮਲਹਨ, ਸਚਿਵ ਓਂਕਾਰ ਸਿੰਘ ਚਾਹਲਪੁਰੀ ਅਤੇ ਜਨਰਲ ਸਕੱਤਰ ਹਰਿਕਿਸ਼ਨ ਗੰਗੜ ਨੇ ਮਰਹੂਮ ਕਿਸ਼ੋਰ ਚੰਦ ਦੇ ਪਰਿਵਾਰ ਵੱਲੋਂ ਕੀਤੇ ਇਸ ਸਮਾਜਿਕ ਭਲਾਈ ਦੇ ਕੰਮ ਅਤੇ ਉਨ੍ਹਾਂ ਦੀ ਆਖਰੀ ਇੱਛਾ ਅਨੁਸਾਰ ਪਾਰਥਿਵ ਸਰੀਰ ਪੀ.ਜੀ.ਆਈ. ਨੂੰ ਸਮਰਪਿਤ ਕਰਨ ਦੀ ਸਾਰਾਹਨਾ ਕੀਤੀ।